ФокIадэм и 19-м Налшык къалэм щекIуэкIащ Дунейпсо Адыгэ Хасэм и XV Зэхуэсышхуэр.
Адыгэхэм я зэгухьэныгъэ нэхъ ин дыдэм илъэсищым зэ иригъэкIуэкI зэхуэсышхуэм кърихьэлIащ КъБР-м и Iэтащхьэ КIуэкIуэ Казбек, Урысей Федерацэм и Президентым Къэрал кIуэцI политикэмкIэ и управленэм Лъэпкъ политикэмкIэ и департаментым и унафэщI Вагинэ Татьянэ, КъШР-м и Парламентым и депутат Щынахъуэ Кърым, АР-м Лъэпкъ IуэхухэмкIэ, хэхэсхэм ядэлэжьэнымрэ хъыбарегъащIэ IэнатIэхэмкIэ и къэрал комитетым и унафэщI Щхьэлахъуэ Аскэр, АР-м, КъБР-м, КъШР-м я цIыхубэ тхакIуэ, Урысейм ЛэжьыгъэмкIэ и ЛIыхъужь, ДАХ-м и Нэхъыжьхэм я советым и тхьэмадэ МэшбащIэ Исхьэкъ, Къэбэрдей-Балъкъэрым Гуманитар къэхутэныгъэхэмкIэ и щIэныгъэ институтым и унафэщI, ДАХ-м и тхьэмадэу щыта Дзэмыхь Къасболэт, Адыгей, Къэбэрдей-Балъкъэр, Къэрэшей-Шэрджэс, Краснодар, Ставрополь, Осетие Ищхъэрэ — Алание хэгъуэгухэм, Тыркум, Сирием, Иорданием, Израилым, Европэм хыхьэ къэралхэм, нэгъуэщI щIыпIэхэм къикIа лIыкIуэхэмрэ хьэщIэхэмрэ, депутатхэр, министрхэр, жылагъуэ лэжьакIуэхэр.
ДАХ-м и тхьэмадэ Сэхъурокъуэ Хьэутий зэIущIэр къызэIуихыу, ар зэрекIуэкIыну щIыкIэр IэIэткIэ яубзыхуа нэужь, псалъэ иратащ Урысей Федерацэм и Президентым Къэрал кIуэцI политикэмкIэ и управленэм Лъэпкъ политикэмкIэ и департаментым и унафэщI Вагинэ Татьянэ. Ар къеджащ УФ-м и Президент Путин Владимир ДАХ-м и Конгрессым хэтхэм Зэрызахуигъазэм.
Хамэ къэрал къикIа ди къуэшхэм, зэхуэсым хэтхэм фIэхъус псалъэкIэ захуигъэзащ КъБР-м и Iэтащхьэ КIуэкIуэ Казбек икIи иужьрей илъэсхэм ДАХ-м иригъэкIуэкI лэжьыгъэм мыхьэнэшхуэ зэриIэр жиIащ.
— Псом япэ фIыщIэ хуэсщIыну сыхуейщ УФ-м и Президент Путин Владимир, ДАХ-м и Конгрессым хэтхэм зэрызакъыхуигъэзам, ди республикэм къыхуищI гулъытэм папщIэ. 1991 гъэ лъандэрэ ДАХ-м зэщIигъэуIуащ щIэныгъэм, щэнхабзэм я лэжьакIуэ цIэрыIуэхэр, жылагъуэ Iуэхум жыджэру хэтхэр, — жиIащ КIуэкIуэм. — Ахэр псори зыхущIэкъур адыгэ лъэпкъым и Iуэхур дэгъэкIынырщ. Нобэ Дунейпсо Адыгэ Хасэм Iэмал псори иIэщ лъэпкъым и сэбэп зыхэлъхэр гъэкIуэтэнымкIэ. А зыращ дунейпсо цIэр зэрихьэу хамэ къэралхэм икъухьа адыгэхэр къызэщIэзыкъуэр, лъэпкъым и щэнхабзэр къэрал куэдым хъума щыхъунымкIэ жэуаплыныгъэ ин зыхьу диIэри, фи лэжьыгъэр нэхъри ефIэкIуэну сынывохъуэхъу!
Адыгэ Республикэм и Iэтащхьэ КъумпIыл Муратрэ Къэрэшей-Шэрджэс Республикэм и УнафэщI Темрезов Рашидрэ Конгрессым хэтхэм зэрызыхуагъазэм къеджащ АР-м Лъэпкъ IуэхухэмкIэ, хэхэсхэм ядэлэжьэнымрэ хъыбарегъащIэ IэнатIэхэмкIэ и къэрал комитетым и унафэщI Щхьэлахъуэ Аскэррэ КъШР-м и Парламентым и депутат Щынахъуэ Кърымрэ.
2021 — 2024 гъэхэм къриубыдэу Дунейпсо Адыгэ Хасэм иригъэкIуэкIа лэжьыгъэхэм убгъуауэ тепсэлъыхьыжащ Сэхъурокъуэ Хьэутий, видеорэ сурэтхэмкIэ и псалъэр щIигъэбыдэжу.
МэшбащIэ Исхьэкъ къыщыпсалъэм къыхигъэщащ Дунейпсо Адыгэ Хасэр къыщызэIуахым езыр зэрыхэтар, иджыри и гуапэу зэрыхэлэжьыхьыр. Адыгэр дэни щыадыгэщ, Урысейм исхэми хамэ къэралхэм щыпсэухэми адыгэ хабзэр яхъумэу, бзэм ирипсалъэу, тхыдэр ящIэу зэрыщытыпхъэр игъэбелджылащ тхьэмадэм.
КъыкIэлъыкIуэу псалъэ зрата, ДАХ-м и Къэзыпщытэ гупым и тхьэмадэ Теркъул Мухьэмэд къызэхуэсахэм я пащхьэ кърихьащ Хасэм ищIэ лэжьыгъэмрэ абы тригъэкIуадэмрэ.
Iуэхум теухуауэ утыкум къыщыпсэлъащ Тыркум щылажьэ Къэбэрдей Хасэхэм я федерацэм и тхьэмадэ Хьэлау Юнал, Къэбэрдей Адыгэ Хасэм и тхьэмадэ ХьэфIыцIэ Мухьэмэд, Европэм щыIэ Адыгэ Хасэхэм я федерацэм и тхьэмадэ Вэрокъуэ Зэтий, Иорданием и Адыгэ ФIыщIэ Хасэм и тхьэмадэ Хьэлащтэ Ибрэхьим, ДАХ-м и Хасащхьэм хэт Табыщ Мурат, Мэздэгу Адыгэ Хасэм и тхьэмадэ Факъуэ Руслан сымэ.
Конгрессым и етIуанэ Iыхьэм хахащ Дунейпсо Адыгэ Хасэм и тхьэмадэр, абы и къуэдзэхэр, ГъэзэщIакIуэ гупым щылэжьэнухэр.
ДызыхуэкIуэ илъэсищым ДАХ-м и тхьэмадэу лэжьэну хахыжащ Сэхъурокъуэ Хьэутий Хьэзрит и къуэр. Абы фIыщIэ яхуищIащ дзыхь къезыгъэзахэм икIи лъэпкъ Iуэхум щхьэкIэ хузэфIэкI къызэримыгъэнэнур жиIащ.