Адыгэбзэм тепсэлъыхьащ

   Дунейпсо Адыгэ Хасэм и хэщIапIэу Налшык къалэ дэтым  зэIущIэ щекIуэкIащ. Ар теухуауэ щытащ адыгэбзэм зегъэужьыным и Iэмалхэм, а мурадыр гъэзэщIа зэрыхъуну щIыкIэхэм.

ЗэIущIэр къызэIуихащ икIи иригъэкIуэкIащ Дунейпсо Адыгэ Хасэм и тхьэмадэ Ажахъуэ Къанщобий. Зэхуэсым кърагъэблэгъа, адыгэбзэмрэ литературэмрэ ирилажьэ Iэ­щIагъэлIхэр, щIэныгъэлIхэр тепсэлъыхьащ адыгэ лIа­къуэ­хэр нобэ зэрыпсалъэ бзэхэм я щытыкIэмрэ хэхэс адыгэ­хэм я деж анэдэлъхубзэр щыхъумэным пыщIа гугъуехьхэмрэ, щIэныгъэ щрат IуэхущIапIэхэм лъэпкъыбзэр ще­гъэ­­джыным и Iуэху зыIутым, зыуэ щыт адыгэ литературэ­бзэм дыхуэкIуэным къыпэрыуэ Iуэхугъуэхэм, нэгъуэщIхэми.