Налшык щекIуэкIащ Дунейпсо Адыгэ Хасэм и зэхуэсышхуэ
ФокIадэм и 19-м Налшык къалэ щекIуэкIащ Дунейпсо Адыгэ Хасэм и XI зимычэзу Конгрессыр. Абы хэтащ Тыркум, Сирием, Иорданием, Германием, Нидерландием, Адыгей, Къэрэшей-Шэрджэс, Краснодар, Ставрополь, Осетие Ищхъэрэ -Алание щIыналъэхэм щызэхэт Адыгэ Хасэхэм я лIыкIуэхэр.
Конгрессым хэтхэм фIэхъус псалъэкIэ захуигъэзащ КъБР-м и Iэтащхьэ КIуэкIуэ Юрий, апхуэдэу псалъэ гуапэкIэ хьэщIэхэм Зэрызыхуагъазэ къагъэхьащ Адыгэ Республикэм и Iэтащхьэ ТхьэкIушынэ Аслъэнджэрий, Къэрэшей-Шэрджэс Республикэм и Iэтащхьэ Темрезов Рашид, Абхъаз Республикэм и Президент Хаджимбэ Рауль сымэ.
Дунейпсо Адыгэ Хасэм и тхьэмадэ Сэхъурокъуэ Хьэутий къыхигъэщащ ДАХ-м и зимычэзу Конгрессыр зэхэшэным щхьэусыгъуэ хуэхъуар ДАХ-м и Уставым урысей хабзэм тету зэхъуэкIыныгъэхэр зэрыхалъхьар, ар IэIэткIэ къащтэн зэрыхуейр зэрыарар, апхуэдэуи жиIащ ДАХ-р къызэрызэрагъэпэщрэ илъэс 25-рэ зэрырикъур икIи а лъэхъэнэм къриубыдэу а зэгухьэныгъэшхуэм зэфIигъэкIа лэжьыгъэхэм, абы Iуэху щызыщIахэм я гуащIэм къызэхуэсахэр щигъэгъуэзащ.
АдэкIэ Конгрессым и лэжьыгъэм къыпищэу ДАХ-м и Хасащхьэмрэ ГъэзэщIакIуэ гупымрэ хэтхэр тепсэлъыхьащ Iуэхугъуэ зэмылIэужьыгъуэ куэдым. Сирием щыпсэу адыгэхэм нобэ я Iуэху зыIутым убгъуауэ тепсэлъыхьащ Сирие ФIыщIэ Хасэм и тхьэмадэ Ниази Саид, Урысеймрэ адрей къэралхэмрэ щыIэ адыгэ жылагъуэ зэгухьэныгъэхэм я лэжьыгъэр зэуIу щIыным, ДАХ-м лъэпкъ, дин зэгухьэныгъэхэм яхуиIэ пыщIэныгъэм къытеувыIащ Бырс Реджаи, Бырсекъуэ Арфан сымэ. Хамэ къэрал щыпсэу адыгэхэм я щIалэгъуалэр Урысейм и еджапIэ нэхъыщхьэхэм щегъэджэным, абыхэм я щIэблэр АР-м, КъБР-м, КъШР-м, Краснодар крайм и сабий зыгъэпсэхупIэхэм къегъэблэгъэным теухуауэ къэрал IуэхущIапIэхэмрэ жылагъуэ зэгухьэныгъэхэмрэ зэрызэдэлажьэм тепсэлъыхьащ ДАХ-м и ГъэзэщIакIуэ гупым хэтхэу Табыщ Мурат, Аслъэн Алий, КъБР-м и жылагъуэ IуэхущIапIэхэм ядэлэжьэнымрэ лъэпкъ IуэхухэмкIэ и управлением и унафэщI КIурашын Анзор.
ДАХ-р къызэрызэрагъэпэщрэ илъэс 25-рэ зэрырикъум ипкъ иткIэ, ЩIыхь тхылъхэмрэ саугъэтхэмрэ Сэхъурокъуэ Хьэутий яритащ лъэпкъым гурэ псэкIэ хуэлажьэ ди лъэпкъэгъухэм, хьэщIэхэм. Абыхэм ящыщщ КъБР-м и тхьэмадэ КIуэкIуэ Юрий, УФ-м и Федральнэ Зэхуэсым ФедерацэмкIэ и Советым хэт Геккиев Заур, Бразилием щекIуэкIа Олимп Джэгухэм щытекIуа ди щIалэхэу Мудрэн Беслъэнрэ Джэду Аниуаррэ, нэгъуэщIхэри.
