Европэм щыпсэу адыгэхэм я щэнхабзэ федерацэм и X-нэ Конгрессыр Бремен къалэм щекIуэкIащ
Европэм щыпсэу адыгэхэм я щэнхабзэ федерацэм и X-нэ Конгрессыр мэзаем и 2-м Бремен къалэм щекIуэкIащ
Хасэм и хабзэм тету, мазэ и пэкIэ, Конгрессым игъэзэщIэн хуей Iухугъуэхэр нахуэ къэзыщI, езыгъэблэгъэ тхылъхэр Хасащхьэм и тхьэмадэм яхуригъэхьащ Федерацэм къыхыхьэу Хаси I0-м я тхьэмадэхэм.
Мэзаем и 2-м Конгрессым кърихьэлIа лIыкIуэхэр жыджэру хэлэжьыхьащ махуэ псом зэхэта зэхуэсым. Абы утыку кърихьа Iуэхугъуэхэм ящыщщ:
- БлэкIа илъэситIым хасэм илэжьар къэпщытэжыныр.
- Хасэм и Уставым и Параграфи 4-м зэхъуэкIыныгъэхэр хэлъхьэныр.
- Европэ Адыгэ Хасащхьэм ( Федэрацэм) и тхьэмадэ хэхыныр.
Хасэм и тхьэмадэ ДыщэкI Эртан Конгрессыр къызэIуихри блэкIа илъэситIым хасэм илэжьахэм тепсэлъыхащ. Федэрацэр зыгъэбэгъуа хасэхэм куэду зэрагъэгушхуари, нэгъуэщI хасэхэми а гъуэгум къытехьэнхэкIэ зэращыгугъыр яжриIа нэужъ, Хасэр щIызэхуэса Iуэхугъуэ нэхъыщхьэм яужь ихьахэщ.
Хасэм и Уставым и Параграфи 4 зэхъуэкIыныгъэхэр халъхьащ
Тхьэмадэ хэхыныгъэу ирагъэкIуэкIам, ДыщэкI Эртанрэ Ворокъуэ Затийрэ хэтащ.
Европэ Адыгэ Хасэм и тхьэмадэу илъэситI пIалъэкIэ хахащ ДыщэкI Эртан.
ПщIэ зыхуэтщI ДыщэкI Эртан!
Дунейпсо Адыгэ Хасэм и ГъэзэщIакIуэ гупым хэтхэм я цIэкIи си щхьэкIи гуапэу сынохъуэхъу Европэм щыпсэу адыгэхэм я щэнхабзэ федерацэм и Тхьэмадэу узэрыхахыжам папщIэ!
Европэм щыпсэу адыгэхэм я щэнхабзэ федерацэми Дунейпсо Адыгэ Хасэми я лэжьыгьэм жыджэру ухэтщ. Дэ уэ дыпщогугъ адыгэ лъэпкъ хабзэ дахэхэр, адыгэбзэр фыщыпсэу къэралхэм щыхъумэным, хэкурысхэмрэ хэхэсхэмрэ я зэпыщIэныгъэр нэхъ куу икIи быдэ хъун папщIэ сыт щыгъуи гулъытэ хуэпщIыну, ипэкIэ бгъэкIуэтэну. А къалэн мытыншым узэрыпэлъэщынур ди фIэщ мэхъу.
ДигукIи ди псэкIи дынохъуэхъу узыншагъэ быдэ, насып, ехъулIэныгъэ, гъуэгуанэ дахэ ин уиIэну.
ПщIэ къыпхуэзыщI,
Дунейпсо Адыгэ Хасэм и тхьэмадэ
СЭХЪУРОКЪУЭ Хьэутий
