Къэрал, политикэ, жылагъуэ лэжьакIуэ цIэрыIуэ Къардэн Самир и фэеплъу
Хъыбар гущIыхьэ къикIащ Хьэшимит пащтыхьыгъуэм. И ныбжьыр илъэс 88-м иту дунейм ехыжащ Иорданиемрэ Урысеймрэ фIыуэ къыщацIыхуу щыта, адыгэ лъэпкъым и къуэ пэж, къэрал, жылагъуэ лэжьакIуэ Къардэн Самир.
Дунейпсо Адыгэ Хасэм и Советымрэ ГъэзэщIакIуэ комитетымрэ хэтхэр яхуогузавэ Къардэн Самир и благъэхэмрэ Iыхьлыхэмрэ.
Къардэныр Хьэшимит пащтыхьыгъуэм и сенатору щытащ. Мызэ-мытIэу абы къыхуагъэфэщащ министр къулыкъур икIи къэрал кIуэцI, къэрал щIыб политикам хэлъхьэныгъэшхуэ хуищIащ. 1980 гъэхэм я етIуанэ Iыхьэмрэ 1990 гъэхэм я япэ Iыхьэмрэ ар Иорданием и Профсоюзхэм я федерацэм и пашэу щытащ.
Къардэн Самир щIэныгъэшхуэ щызэригъэгъуэтат Амман къалэм. Тхуэнейрэ ар хахыжащ Шэрджэс псапащIэ зэгухьэныгъэм (Иорданием) и унафэщIу, апхуэдэуи ДАХ-м и вице-президенту щытащ.
Ди къуэш нэхъыжьым хэхэс адыгэхэм я тхыдэм увыпIэшхуэ щеубыд.
Абы жиIэрт: «Адыгагъэм тхыдэ, щэн-хабзэ мыхьэнэшхуэ щIэлъщ. Ар ди лъэпкъ щэнхабзэм и лъабжьэщ. Ар димыIэмэ, дэри дыщыIэнукъым. Ар дымыхъумэмэ, зыми дыкъыфIэуэхунукъым».
Уасэншэщ Къардэн Самир Дунейпсо Адыгэ Хасэр къызэгъэпэщынымрэ зэфIэгъэувэнымрэ хэлъхьэныгъэу хуищIари. Илъэс куэдкIэ Хьэшимит пащтыхьыгъуэм щыпсэу адыгэхэм я Iуэху еплъыкIэхэр абы ДАХ-м къыщигъэлъэгъуащ, апхуэдэуи жыджэру ар ядэлажьэрт Кавказми хамэ къэралхэми щыIэ адыгэ щэнхабзэ зэгухьэныгъэхэм.
КъызыхэкIа лъэпкъым и гугъуехьхэм ятеухуауэ абы къиIэт Iуэхухэм мыхьэнэшхуэ яIэт икIи и псалъэми пщIэ иIэт.
Къардэн Самир и лъэпкъэгъухэм сыт щыгъуи дэIэпыкъуэгъу яхуэхъуу щытащ, псапэ ищIэу къэгъуэгурыкIуащ ар. Езым хуэфэщэну къуитI къыщIэхъуащ.
Нобэ апхуэдэ цIыху гуащIафIэ зэрытхэкIар ди дежкIэ гущIыхьэщ. Къардэн Самир адыгэ псоми я гум илъынущ, цIыху Iущу, хэкупсэу, адыгэлIу зэрыпсэуам хуэдэу.
Алыхьым жэнэткIэ уигъэгуфIэ, ди къуэш пажэ.
Дунейпсо Адыгэ Хасэм и Советымрэ ГъэзэщIакIуэ комитетымрэ
