Ди гум илъынущ Къандур Мухьэдин
Иорданием щылажьэ Адыгэ ФIыщIэ Хасэм деж
Иорданием щыпсэу ди хэкуэгъу лъапIэхэ!
ПщIэ зыхуэтщI Ибрагим Исхакат!
Дунейпсом фIыуэ къыщацIыху, адыгэ лъэпкъым и къуэ пэж, тхакIуэ, режиссер, щIэныгъэлI, адыгэ щэнхабзэм хэлъхьэныгъэ ин хуэзыщIа Къандур Мухьэдин Иззэт и къуэр дунейм зэрехыжар хуабжьу дигу щIыхьащ.
Мухьэдин къыщалъхуа щIыпIэр, Иорданием и щыхьэр Амман, нобэ иужь дыдэ псэ тыншыпIэ хуэхъужащ.
Къандурыр къыщацIыху Европэми, Азиеми, США-ми. Илъэс 50-м щIигъукIэ Голливудым епхауэ лэжьа Мухьэдин пщIэшхуэ зыпылъ саугъэт лъапIэ куэд киногъуазджэм къыщыхуагъэфэщащ. Абы и лэжьыгъэхэм ящыщщ «Черкес», «Фейсбук романс» фильмхэр.
Къандур Мухьэдин и тхыгъэхэр зэрадзэкIащ урысыбзэкIэ, франджыбзэкIэ, испаныбзэкIэ, хьэрыпыбзэкIэ, нэгъуэщIхэмкIи.
Ди къуэш нэхъыжьым къызыхэкIа лъэпкъым хуиIэ мурадыфIхэр зригъэхъулIэн папщIэ лъэкI къыгъэнакъым. Абы и щыхьэтщ «Балкан тхыдэр», «Шэрджэсхэр» трилогиер, нэгъуэщI роман куэд дунейм къызэрытехьар, Къандурым и музыкэ лэжьыгъэхэр Москва дэт консерваторием, Баку, Амман зэрыщагъэзэщIар.
«Кавказ» тхыгъэшхуэр Москва инджылыбзэрэ урысыбзэкIэ «Лада-М» тхылъ тедзапIэм къыщыдэкIащ, адыгэбзэкIэ 1997 гъэм Налшык «Эльбрус» тхылъ тедзапIэм щытрадзащ.
Мухьэдин Хэкужьми фIыуэ къыщалъагъу, абы къыхуагъэфэщащ «Къэбэрдей-Балъкъэрым и цIыхубэ тхакIуэ» цIэ лъапIэр.
Къэндур Мухьэдин и IуэхущIафэ щхьэпэхэмкIэ, и зэфIэкI инхэмкIэ, и хьэл-щэн дахэхэмкIэ и цIэр игъащIэкIэ мыкIуэдыжыну ди лъэпкъ тхыдэм къинэнущ, сыт щыгъуи адыгэхэм я гум илъынущ.
Дунейпсо Адыгэ Хасэм и Хасащхьэм хэтхэр дыхуогузавэ Къандур Мухьэдин и благъэхэмрэ Iыхьлыхэмрэ.
Дунейпсо Адыгэ Хасэм и тхьэмадэ
СЭХЪУРОКЪУЭ Хьэутий
Налшык къалэ,
2023 гъэ, щэкIуэгъуэм и 28
