ТхылъыщIэ. «Дунейпсо Адыгэ Хасэ: IуэхущIафэхэмрэ хъуэпсапIэхэмрэ»
Налшык и «Тетраграф» ООО-м и бжыгъэр зы мин хъууэ къыщыдэкIащ «Адыгэ псалъэ» газетым и редактор нэхъыщхьэм и къуэдзэ, КъБР-м щIыхь зиIэ и журналист Ширдий Маринэ и тхылъыщIэ. «Дунейпсо Адыгэ Хасэ: IуэхущIафэхэмрэ хъуэпсапIэхэмрэ» художественно-публицистикэ къыдэкIыгъуэм и редакторыр ХьэфIыцIэ Мухьэмэдщ.
Лэжьыгъэм щызэхуэхьэсыжащ ДАХ-м и зэхуэсибгъуми щыжаIахэмрэ къыщыхалъхьахэмрэ зи лъабжьэ тхыгъэхэр, а зэIущIэхэм кърихьэлIахэм, хэхэс адыгэхэм ящыщу хэкужьым щыхьэщIахэм, апхуэдэуи зэман зэхуэмыдэхэм лъахэм къитIысхьэжа ди лъэпкъэгъухэм къыIаха интервьюхэр, абыхэм я Iуэху еплъыкIэхэмрэ я мурадхэмрэ, гурыгъухэмрэ хъуэпсапIэхэмрэ къыщыгъэлъэгъуа IэдакъэщIэкIхэр, нэгъуэщIхэри. Хэхэс гъащIэм игъэгулэз ди тхакIуэ-усакIуэхэм я IэдакъэщIэкIхэри щIыпIэ-щIыпIэкIэрэ тегъэщIапIэ щищIащ Ширдий Маринэ.
Псоми я лъабжьэр, нэхъыщхьэу къыхэщыр зыщ: ди лъэпкъыр зэуIу хъужынырщ, ди цIыхухэм я фэм дэкIар ящызыгъэгъупщэн нэплъэжыгъуэ ягъуэтынырщ, а лъэныкъуэмкIэ къэралыр къакъуэувэу, езыхэми яхузэфIэкI халъхьэу гурэ псэкIэ зэпха щIыналъэм къитIысхьэжынырщ. Къэдгъэлъэгъуам ди дзэр Iузыудын хэт?! ДифI къызыхэкIынрэ лъэпкъым зыкъезыгъэIэтынрэ фIэкIа хэплъагъуэркъыми, мис ахэр унафэрэ къэралым щызекIуэ хабзэкIэ щIегъэгъэбыдэныр ди хъуэпсапIэщ. Тхылъым къыщыIэта гупсысэ нэхъыщхьэри аращ.
«Дунейпсо Адыгэ Хасэ: IуэхущIафэхэмрэ хъуэпсапIэхэмрэ» тхылъыр къулейщ сурэт гъэщIэгъуэнхэмкIэ. ЗэIущIэхэм щытрахауэ абы итщ Хасэм и Iуэхузехьэхэм, абы зи псалъэ щыжызыIахэм, и лэжьыгъэм хэлIыфIыхьахэм, къапщтэмэ, адыгэм и Iуэхум игъэгузавэ цIыху телъыджэу къэрал куэдым щыпсэухэм я сурэтхэр. Абыхэм нэхъри наIуэу уи нэгу къыщIагъэувэ ди лъэпкъыр зэрылъэщыр, акъылкIи IэпкълъэпкъкIи Iэчлъэч апхуэдэ цIыхухъухэмрэ цIыхубз Iущхэмрэ диIэу лъэпкъыр зэрымыкIуэдынур.
Лэжьыгъэр зэхуещIыж Дунейпсо Адыгэ Хасэм и президенту щытахэм ятеухуа тхыгъэ кIэщIхэмкIэ. Апхуэдэхэу Къалмыкъ Юрэ, Щхьэлахъуэ Абубэчыр, Акъбащ Борис, Нэхущ Заурбий, Дзэмыхь Къасболэт, Ажахъуэ Къанщобий, Сэхъурокъуэ Хьэутий сымэ я цIэхэм епхащ Дунейпсо Адыгэ Хасэм хузэфIэкIар, и къарум къихьыр, и хъуэпсапIэхэм зэрылъэIэсынур.
Ширдий Маринэ фIыщIэ яхуещI тхылъыр зи мылъкукIэ къыдэкIа «Бум-Банк» коммерцэ банкым и унафэщI Ажахъуэ Къанщобий, ар гъэхьэзырынымкIэ къыдэIэпыкъуа псоми.
«Адыгэ псалъэ». ИСТЭПАН Залинэ.