Накъыгъэм (майм) и 21-р адыгэхэм я Щыгъуэ-щIэж махуэщ
Ныбжьэгъу лъапIэхэ!
Накъыгъэм (майм) и 21-р адыгэхэр мэщыгъуэ Кавказ зауэжьым хэкIуэда ди адэжьхэм папщIэ. Зэман жыжьэм ди лъэпкъыр зыхэта гуауэр дигу къыщыдгъэкIыжкIэ, илъэси 100-м щIигъукIэ екIуэкIа зауэжьым насыпыншагъэу къытхуздихьам дегъэгумэщI.
Дэ дигу щIохьэ а зауэжьым зи щхьэр хэзылъхьахэм нэмыщI, къэнам я нэхъыбэр хэкум зэрырахуар.
Ауэ адыгэр дуней псом тепхъа хъуами, абы къару къызэкъуихыфащ и щхьэр, и лъэпкъ хьэл-щэнхэр, и бзэр, и хабзэр ихъумэжыну.
БлэкIар зыщыдгъэгъупщэ хъунукъым, тхыдэм дерс къыхэтхкIэрэщ ди къэкIуэнур убзыхуа зэрыхъунур.
Дэтхэнэ зыри къыхузоджэ блэкIам къытхуихьа гуныкъуэгъуэр зыщыдмыгъэгъупщэу нобэ къыдэкIуэтей щIалэгъуалэр лъэпкъым хуэпэжу дгъэсэну.
Адыгэхэм я Щыгъуэ-щIэж махуэм екIуэкIыну дауэдапщэхэр тхуэщхьэпэн тхьэм ищI, ди сэбэп хэлъу тхьэм къыщIигъэкI.
Лъэпкъым апхуэдэ гузэвэгъуэ тхьэм зэи димыгъэлъагъу!
Дунейпсо Адыгэ Хасэм и тхьэмадэ
Сэхъурокъуэ Хьэутий
