Лъэпкъ зэпыщIэныгъэр ягъэбыдэ
Дунейпсо Адыгэ Хасэм и Хасащхьэм хэтхэм я зи чэзу зэхуэсыр щэбэт кIуам Налшык къалэ щекIуэкIащ.
Лъэпкъым и зыужьыныгъэм, хамэ щIыпIэ куэдым щикъухьа адыгэхэм я зэкъуэтыныгъэм, абыхэм я зэпыщIэныгъэхэр гъэбыдэным, зыIууэ гугъуехьхэр гъэзэкIуэжыным, къапэщылъ къалэнхэр убзыхуным теухуа псалъэмакъ купщIафIэ куэд къыщаIэта зэхуэсышхуэм хэтащ Урысей Федерацэм, Тыркум, Иорданием, Сирием щызэхэт Адыгэ Хасэхэм я тхьэмадэхэмрэ лIыкIуэхэмрэ.
ДАХ-м и Хасащхьэм и зэIущIэм кърагъэблэгъащ УФ-м и Федеральнэ Зэхуэсым ФедерацэмкIэ и Советым хэт Къэжэр Альберт, «Россотрудничество» IуэхущIапIэм ди хэкуэгъухэмрэ правительствэм пымыщIа зэгухьэныгъэхэмрэ ядэлэжьэнымкIэ и управленэм и унафэщIым и къалэнхэр зыгъэзащIэ Пугачев Вячеслав, КъБР-м и Iэтащхьэмрэ Правительствэмрэ я Администрацэм республикэм и къэрал кIуэцI Iуэхухэр зэкIэлъыгъэкIуэнымкIэ и управленэм и унафэщI Махуэ Владимир, КъШР-м и Iэтащхьэмрэ Правительствэмрэ я Администрацэм и Iэтащхьэм и къуэдзэ Чыкуэ Нурбий, КъБР-м и Парламентым и УнафэщIым и япэ къуэдзэ Жаным Руслан, КъБР-м Жылагъуэ, дин зэгухьэныгъэхэм я IуэхухэмкIэ и къэрал комитетым и унафэщI Пащты Борис, КъБР-м и Архив IэнатIэм и Iэтащхьэ Къарэ Арсен, нэгъуэщIхэри.
ЗэIущIэр къызэIуихащ икIи иригъэкIуэкIащ ДАХ-м и тхьэмадэ Ажахъуэ Къанщобий. ХьэщIэхэм къызэхуэсахэм зыхуагъэза нэужь, Хасащхьэм хэтхэр тепсэлъыхьащ Сирием щыпсэу ди лъэпкъэгъухэм я Iуэху зыIутым; къэрал къулыкъущIапIэхэр щIыналъэ зэхуэмыдэхэм щыIэ адыгэ жылагъуэ зэгухьэныгъэхэм зэрадэлажьэм; УФ-мрэ хамэ къэралхэмрэ щыIэ Хасэхэм я лэжьыгъэр зэрекIуэкIым; 2014 гъэм Сочэ щыIэну Олимпиадэм, Урыс-Кавказ зауэр зэриухрэ илъэси 150-рэ щрикъукIэ иращIэкIыну Iуэхугъуэхэм, нэгъуэщIхэми.
Зэхуэсышхуэр зэрекIуэкIам теухуа тхыгъэ убгъуа ди газетым и къыкIэлъыкIуэ къыдэкIыгъуэхэм ящыщ зым тетынущ.
НэщIэпыджэ Замирэ.
Сурэтыр Къарей Элинэ трихащ.