«КъэвгъэувыIэ Сирием щекIуэкI лъыгъажэр!»
ЗэпэщIэтыныгъэр зыщымыужьых Сирие Хьэрып Республикэм къина адыгэхэм, нэгъуэщI ди хэкуэгъухэм ядэIэпыкъуным къыхуезы-джэ пэкIу щекIуэкIащ ды-гъэгъазэм и 2-м Москва къалэм.
А Iуэхугъуэм ирипIейтейуэ къалащхьэм щыпсэу адыгэ, абхъаз, абазэ куэд къекIуэлIащ «Хэкум и гъунапкъэ хъумакIуэхэм» («Пограничникам отечества») я фэеплъым деж. Урысей, къащхьэщыж ди лъэпкъэгъухэм!» – апхуэдэ къыхуеджэныгъэхэмкIэ гъэнщIат зэхыхьэр.
— Нэхъыщхьэу дызыхущIэкъур гузэвэгъуэм зэщIищта хьэрып къэралым къина ди лъэпкъэгъухэр икIэщIыпIэкIэ къишыжыныращ. Урысейм и дэIэпыкъуэгъукIэ ди цIыху нэхъыбэ къедгъэлыфынут, – жиIащ пэкIур къызэIузыха Хъурей Аслъэн.
— Зэкъуэтыныгъэр къыщыдгъэлъэгъуэнур нобэ хуэдэ махуэщ, – къыхигъэщащ Москва щылажьэ Адыгэ Хасэм хэт нэхъыжьхэм я тхьэмадэ Агырбэ Юрэ. – Гузэвэгъуэ хэхуа ди къуэшхэм я гугъапIэр зыхуэгъэзар дэращ – хэкужьымкIэ щыIэхэрщ. Щапхъэу къэтхьыфынущ Косовэ къикIыжауэ Адыгэ Республикэм мамыру щыпсэухэр. Ахэри апхуэдэ гузэвэгъуэт къызыхэтшар. Урысейм и дэIэпыкъуэгъукIэ Сирием щыIэ ди лъэпкъэгъу нэхъыбэм нобэ къагъэзэжыфмэ, шэч хэлъкъым ди къэралым сэбэп ирагъэкIыу зэрыпсэунум.
ПэкIум и кIэм къащтащ УФ-м и лIыщхьэхэм зэрызыхуагъазэ тхылъ. Абы итщ «Сирием къина Урысейм и хэкуэгъухэр (адыгэхэр яхэту) ди къэралым къихьэжын Iуэхур нэхъ псынщIэ яхуэщIынымкIэ» лъэIу.
«Адыгэ псалъэ» газетым и корреспондент.