Адыгэбзэм и гъащIэм къыпызыщэну Iэмалхэр
Гъатхэпэм и 14-м, Адыгэ тхыбзэм и махуэм, Дунейпсо Адыгэ Хасэм и ГъэзэщIакIуэ гупым я зи чэзу зэIущIэ Налшык щекIуэкIащ.
Абы хэтащ Тырку, Иордание, Сирие къэралыгъуэхэм, Адыгэ, Къэрэшей-Шэрджэс, Къэбэрдей-Балъкъэр республикэхэм, Ставрополь, Краснодар щIыналъэхэм щыIэ хасэ къудамэхэм я лIыкIуэхэр. Израилымрэ Европэмрэ видеозэпыщIэныгъэкIэ лэжьыгъэм хэтащ (коронавирусым и зэранкIэ щыпсэу къэралхэм кърагъэкIакъым).
ЗэIущIэм кърихьэлIащ КъБР-м и Iэтащхьэм и Администрацэм ЩIыналъэ политикэмкIэ и управленэм и унафэщI Къуэжей Артём, КъБР-м Граждан жылагъуэ IуэхущIапIэхэм ядэлэжьэнымрэ лъэпкъ IуэхухэмкIэ и министр КIурашын Анзор, ДАХ-м и Советым хэт, Къэбэрдей Адыгэ Хасэм и тхьэмадэ ХьэфIыцIэ Мухьэмэд, Иорданием щыIэ Адыгэ ФIыщIэ Хасэм и тхьэмадэу къыкIэлъыкIуэ пIалъэми лэжьэну иджыблагъэ хахыжа нэхъыжьыфI Къардэн Самир, Адыгэ жылагъуэ зэгухьэныгъэхэм я лэжьыгъэр зэзыгъэуIу советым и тхьэмадэ Къалмыкъ Жылэбий сымэ, нэгъуэщIхэри. Абы и пэщIэдзэм ДАХ-м и тхьэмадэ Сэхъурокъуэ Хьэутий къызэхуэсахэм Адыгэ тхыбзэм и махуэ лъапIэмкIэ ехъуэхъури, бзэм и гъащIэм къыпызыщэну Iэмалхэм я гугъу ищIащ.
ИлъэсыщIэм и япэ мазищым ДАХ-м илэжьахэм, шапсыгъхэм я «Адыгэ Хасэ» жылагъуэ зэгухьэныгъэм зэфIигъэкIхэмрэ, «Анэдэлъхубзэр лъэпкъым и гупсэщ» проектыр зэрагъэзащIэм, абы ипкъ иткIэ лъэпкъыр къызэщIигъэушэу иджыблагъэ ирагъэкIуэкIа «Адыгэ диктант» Iуэхугъуэм щытепсэлъыхьащ абы. КъищынэмыщIауэ, утыку кърахьащ «Адыгэ псалъэ» газетым и редактор нэхъыщхьэ, Къэбэрдей Адыгэ Хасэм и тхьэмадэ ХьэфIыцIэ Мухьэмэд игъэхьэзыру иджыблагъэ къыдагъэкIа «Панорама культурной жизни черкесской диаспоры» тхылъыр.
ГъэзэщIакIуэ гупым къызэдащтащ ДАХ-р мы гъэм зэрылэжьэну планыр, Кавказ зауэр зэриухрэ илъэси I56-рэ щрикъум ирагъэкIуэкIыну Iуэхугъуэхэр, ди лъэпкъэгъухэм я щIэблэр гъэмахуэ зыгъэпсэхупIэм адэжь хэкум зыгъэпсэхуакIуэ къэшэныр, нэгъуэщIхэри.
ЗэIущIэм щагъэлъэпIащ «Адыгэ диктантыр» езыгъэкIуэкIахэмрэ, ар «тхукIэ» зытхахэмрэ.
Щомахуэ Залинэ.
