Iуэху щхьэпэ
Мазэм нэблэгъащ Тыркум, Германием, Иорданием, Сирием, Израилым, Тунисым, Финляндием щыпсэу ди лъэпкъэгъухэм адыгэбзэмрэ урысыбзэмрэ щаджу пэIудза курсхэр зэрызэхашэрэ. Ар къызэригъэпэщащ КъБР-м Граждан жылагъуэ зэгухьэныгъэхэм ядэлэжьэнымрэ лъэпкъ IуэхухэмкIэ и министерствэм. ЖыIэпхъэщ мыпхуэдэ Iуэху щхьэпэхэр къызэгъэпэщыныр министерствэм и дежкIэ зэримыщыпэ лэжьыгъэр. Апхуэдэу, ипэIуэкIэ Сирием къиIэпхъукIыжа адыгэхэр щрагъаджэ курсхэр къызэрагъэпэщат Дунейпсо Адыгэ Хасэм дэщIыгъуу.
АдыгэбзэмкIэ дерсхэр ирегъэкIуэкI Табыщ Мурат, урысыбзэр ярегъэдж Щоджэн Iэминат. Дауи, тыншкъым къэрал зыбжанэм щыпсэу адыгэхэм хъыбар ябгъащIэу егъэджэныгъэм къепшэлIэну. Мы Iуэхум и гуащIэ хилъхьащ ДАХ-м и тхьэмадэ Сэхъурокъуэ Хьэутий. ГъэзэщIакIуэ гупым и иужьрей зэхуэсым абы захуигъэзащ зи цIэ къитIуа къэралхэм я Хасэ тхьэмадэхэм икIи къыхуриджащ бзэхэр яджыну гукъыдэж зиIэу ди лъэпкъэгъухэм яхэтыр курсхэм кърашэлIэну.
Интернетым и Iэмалхэр къагъэсэбэпу пэIудзауэ бзэхэр зрагъэщIэну Iэмал зэрагъуэтар хуабжьу ягу ирихьащ ди лъэпкъэгъухэм. Тыркум щызэхэт КАФФЕД-м, Германиемрэ Иорданиемрэ щыIэ «Адыгэ Хасэхэм» я лIыкIуэхэм яхузэфIэкIащ зэман кIэщIкIэ хъыбарыр щIыпIэ куэдым щызэлъагъэIэсыныр, курсхэм къыхыхьэну гукъыдэж зыщIахэр гупу зэхэшэныр. Апхуэдэу, проектым къигъэлъэгъуа цIыху 90-м и пIэкIэ мы зэманым гупхэм еджакIуэу хэтыр цIыху 210-рэ мэхъу. КъызэгъэпэщакIуэхэм зэрыжаIамкIэ, къыхыхьэну хуейхэм я бжыгъэр куэдкIэ нэхъыбэт. Абы къыхэкIыу, мы курсхэр иухмэ, адэкIи къыпащэну я гугъэщ.
Программэр сыхьэти 104-уэ (адыгэбзэмкIэ сыхьэт 52-рэ, урысыбзэмкIи сыхьэт 52-рэ) зэхэлъщ. Дерсхэр щрагъэкIуэкIыр ZOOM интернет утыкурщ. ЖыпIэнурамэ, мыпхуэдэ щIыкIэкIэ бзэр ебгъэджыныр тыншкъым, методикэ щхьэхуэ хуейщ. ЕгъэджакIуэ Iэзэхэм яхузэфIэкIащ дерсхэр купщIафIэу, удихьэхыу еджакIуэхэм я пащхьэ иралъхьэну. Апхуэдэурэ гъэщIэгъуэну екIуэкI дерсхэм къыхыхьэхэр нэхъ мащIэ хъуркъым, еджакIуэхэми жэуаплыныгъэ яхэлъу, жыджэру холэжьыхь. Курсхэр и кIэм нэсмэ, абы къекIуэлIахэм экзамен къыIахынурэ зэреджамкIэ щыхьэт тхылъхэр (сертификатхэр) иратыжынущ.
Мы лэжьыгъэр щыщщ ди лъэпкъэгъухэр хэкум къешэлIэжынымкIэ Урысей Федерацэм щыIэ программэм. Дыхуейт мы курсхэм къекIуалIэ ди лъэпкъэгъухэм ящыщ куэдым адэжь лъахэм къагъэзэжыну мурад ящIыну, абыхэм къащIэхъуэну щIэблэм я анэдэлъхубзэр яIурылъу Хэкум и цIыху хъужыну.
КЪАРЭНАШЭ Iэминат.