Гъатхэпэм и 14-р Адыгэ тхыбзэм и махуэщ
Дунейпсо Адыгэ Хасэм 2003 гъэм къыхилъхьауэ щыта жэрдэмым ипкъ иткIэ гъатхэпэм и 14-р лъэпкъ махуэгъэпсым Адыгэ тхыбзэм и махуэу щагъэнэхуащ, абы лъандэрэ зэрыадыгэ дунейуэ ар ягъэмэхуэщI икIи Iуэхугъуэ купщIафIэхэмкIэ зэдаIэт.
Лъэпкъым зиужьыныр быдэу пыщIащ и бзэм. Аращ дунейм лъэпкъыу тетыр и анэдэлъхубзэм щIыхуэсакъыр, ар ихъумэну, иригъэфIэкIуэну щIыхэтыр. А зыужьыныгъэм и лъабжьэщ тхыбзэр.
1853 гъэм мартым и 14-м Берсей Умар и «Адыгэбзэ букварыр» Тифлис къыщыдэкIащ, абы къигъэсэбэпат хьэрып тхыбзэм и хабзэхэр.
Тхылъыр дунейм къыщытехьа а махуэрщ нобэ дгъэлъапIэ махуэшхуэм къежьапIэ хуэхъуар.
Берсейм и лэжьыгъэр адэкIэ ягъэкIуэтащ абы иригъэджахэу ХьэтIохъущокъуэ Къазийрэ КIашэ Адэлджэрийрэ.
Лъэпкъ педагогикэ щIэныгъэм и лъабжьэр зыгъэтIылъа ХьэтIохъущокъуэ Къазий «Къэбэрдей алыфбейр» 1865 гъэм Тифлис щытригъэдзащ. Нобэ дызытет тхыбзэм ар щапхъэ хуэхъуащ.
Нэхъыщхьэращи, лъэпкъ сабийр Iэмал имыIэу и бзэмкIэ егъэджэн хуейщ гупсысэрщ зытетар ХьэтIохъущокъуэр.
Нобэ едгъэкIуэкI Iуэхугъуэ дахэхэри аращ зыхуэунэтIар. Апхуэдэу хамэ хэкухэм щыпсэу ди лъэпкъэгъухэм я сабийхэр адыгэбзэ щрагъаджэ курсхэр къызыдогъэпэщ. Интернетым и Iэмалхэри къагъэсэбэпурэ ди егъэджакIуэхэр ядолажьэ тхэкIэрэ еджэкIэрэ зэзыгъэщIэжыну хуей ди хэкуэгъухэми. А Iэмалыр къагъэсэбэпу Дунейпсо Адыгэ диктантым къыхыхьахэщ Урысей Федерацэм и щIыналъэ куэдым, Тыркум, Сирием, Иорданием, Израилым, Европэм, Америкэм щыпсэу цIыху куэд. Абы хэтащ ди еджагъэшхуэхэри, лэжьакIуэхэри, еджакIуэхэри, къэрал, щIыпIэ властхэм, щIэныгъэ IэнатIэхэм, жылагъуэ, лъэпкъ, творческэ зэгухьэныгъэхэм я IэщIагъэлIхэр.
Дунейпсо Адыгэ Хасэм и ГъэзэщIакIуэ гупым и цIэкIэ, си щхьэкIэ сэ къызбгъэдэкIыу нобэрей МахуэшхуэмкIэ си гуапэу сывохъуэхъу си лъэпкъэгъу псоми! Ину фIыщIэ яхузощI адыгэбзэр хъумэным зи къару, зэфIэкI, щIэныгъэ езыхьэлIэ дэтхэнэми.
СЭХЪУРОКЪУЭ Хьэутий,
Дунейпсо Адыгэ Хасэм и тхьэмадэ