Нобэми илъэсищ къэкIуэнуми теухуауэ
ЗэIущIэшхуэр, къэрал къулыкъущIэхэри, лIыкIуэхэри, хьэщIэхэри зыхэтар, щекIуэкIар Налшык и Къэрал киноконцерт гъэлъэгъуапIэрщ. Абы кърихьэлIащ икIи къыщыпсэлъащ КъБР-м и Iэтащхьэ Къанокъуэ Арсен (жиIар щхьэхуэу тыдодзэ), Тыркум, Сирием, Иорданием, Германием, США-м, Адыгейм, Къэрэшей-Шэрджэсым, Абхъазым, Къэбэрдей-Балъкъэрым, Шапсыгъым я лIыкIуэхэр.
Фигу къэдгъэкIыжынщ. ДАХ-м и Зэхуэсыр илъэсищым зэ йокIуэкI. Абы къыщапщытэж я лэжьыгъэр, Дунейпсо Адыгэ Хасэм и президентыр, Советыр, ГъэзэщIакIуэ гупыр хах, адыгэ лъэпкъыр зыгъэпIейтей Iуэхугъуэхэм щытопсэлъыхь, илъэсищ пIалъэм ящIэн хуейуэ зыхуагъэувыж къалэнхэр яубзыху.
Дунейпсо Адыгэ Хасэм 2009 – 2012 гъэхэм хузэфIэкIам теухуауэ кIэщIу къэпсэлъащ а пIалъэм мы жылагъуэ организацэм и президенту щыта Ажахъуэ Къанщобий. ДАХ-м и КъэпщытакIуэ гупым и лэжьыгъэр абы и унафэщIым и къуэдзэ МэшхуэфI Нэждэт къипщытэжащ. ИужькIэ тхьэмадэр, абы и япэ къуэдзэр, ГъэзэщIакIуэ гупым хэтхэр хахащ. Урыс-Кавказ зауэр зэриухрэ илъэси 150-рэ зэрырикъум ещIэкIын хуей Iуэхугъуэхэм тепсэлъыхьащ Къэбэрдей Адыгэ Хасэм и тхьэмадэ ХьэфIыцIэ Мухьэмэд.
Зэхуэсым и етIуанэ махуэм лIыкIуэхэр хэплъащ ДАХ-м и Уставым зэхъуэкIыныгъэ хэлъхьэным, 2014 гъэм Сочэ щекIуэкIыну Олимпиадэм, Адыгэ, Абхъаз хасэ- хэр зэдэгъэлэжьэным, ди лъэпкъ Iуэхухэм щIалэгъуалэр къыхэшэным епха жэрдэмхэм.
ДАХ-м и Тхьэмадэу хахащ Сэхъурокъуэ Хьэутий.
Зэхуэсым къыщащтащ ДАХ-м и IX Конгрессым УФ-м и Президент Путин Владимир, ФедерацэмкIэ и Советым и УнафэщI Матвиенкэ Валентинэ, Къэрал Думэм и Iэтащхьэ Нарышкин Сергей сымэ Зэрызыхуагъазэхэр, Сирием щыпсэу ди лъэпкъэгъухэр зауэм къыхэшыным, Олимпиадэ-2014-м и щэнхабзэ программэм адыгэхэм ехьэлIауэ къыхэщынум, нэгъуэщIхэми ятеухуа документхэр.
ШИРДИЙ Маринэ.
Сурэтхэр Къарей Элина трихащ.
«Адыгэ псалъэ»