Жьы хъуа псалъэхэр адыгэбзэм

Бзэщ1эныгъэм и разделхэр къатщтэмэ, лексикологиер зэхъуэк1ыныгъэ нэхъыбэ дыдэ здек1уэк1хэм ящыщ зыщ. Сыту жып1эмэ, гъащ1эм зеужь, хьэпшыпыщ1э куэд къожьэ, хьэпшыпыр къэдмыгъэсэбэпыж хъумэ, псалъэри дызыхуэмеиж мэхъу. Абы ипкъ итк1э къыхыдогъэк1 жьы хъуа псалъэхэр. Жьы хъуа псалъэхэр гупищу гуэшащ: историзмхэр, архаизмхэр,  анахронизмхэр.

Историзмхэр – жьы хъуа псалъэхэщ, абыхэм къагъэлъагъуэу щыта хьэпшыпыр къызэрыдмыгъэсэбэпыжым къыхэк1к1э псалъэри лъэныкъуэ едгъэзауэ.

Лъыщ1эж//лъыщ1ажь – кровная месть; афэ//ашъо – кольчуга; къулъкъэшхъэн – беглый крепостной; азэт – вольноотпущенник;  лэгъунэпыт – сословие несвободных крестьян; мэ1у – щит.

Архаизмхэр – жьы хъуа псалъэхэщ, абыхэм къагъэлъагъуэу щыта  хьэпшыпым нэгъуэщ1 ф1эщыгъэц1э зэригъуэтам къыхэк1к1э къдмыгъэ­сэбэпыжу.

Архаизмхэр                иджырей бзэм             урысыбзэк1э

Дафэзехьэ                     шыгъажэ                      скачки

Дакъэхэк1э                   1энэк1апэ                     непочетное место

Дерс                                урок                              урок, домашнее задание

Санжакъ                       бэракъ                          знамя

Вы ц1ык1у                            мэшбэв                         божья коровка

О.С.Ахманова и «Лингвистическэ терминхэм я псалъалъэм» зэритымк1э, анахронизмхэр — дызыхэпсэук1 гъащ1эм, зэманым къемызэгъыжу къагъэсэбэп псалъэхэрщ.

Анахронизмхэм я щапхъэу къэтхь хъунущ къэщ1эрэщ1эжауэ къэдгъэсэбэп псалъэхэр: хасэ – сход, собрание; хьэщ1эщ – «гостиница» мыхьэнэращ ди зэманым и1эр. Мы псалъэхэм пасэ зэманым, л1эщ1ыгъуэ зыбжанэк1э узэ1эбэк1ыжмэ я1а мыхьэнэр зэхъуэк1а хъуащ, ди зэманым къэдгъэсэбэпу щытми.

Адыгэбзэхэм къыщык1уэ жьы хъуа псалъэхэр къигъэлъагъуэ мыхьэнэм елъытауэ гуп зыбжанэу бгуэш хъунущ.

1. Хабзэ щымы1эж гуэр къэзыгъэлъагъуэ псалъэхэр:

Хьэлыуэ 1эпищ. Фэрэк1 къызэуза сабийр хъужа иужьк1э, хьэл1амэ хуагъавэрт, сабийм и 1эпищым и п1э тедзауи гъунэгъухэм хуахьырт, я сабийр зэрыхъужам иджы укъык1элъык1уэ зэрыхъунум и щыхьэту.

Гъуэгудэгъазэ. Мыр адыгэхэм хьэщ1эм хуащ1 пщ1эм, к1элъызэрахьэу щыта  хабзэм ящыщ зыщ. Къуажэм дэк1ыу гъуэгу техьам, хьэщ1э къак1эу илъагъумэ, къигъэзэжырти къуажэм нэс къигъэблагъэт, хьэщ1эм хуит къищ1ыжмэ, и гъуэгум пищэжырт.

Дыщрыс. Пасэ зэманым щыгъуэ нысэр унагъуэ ихьа иужьк1э, и дыщым илъэск1э щис къэхъурт, зыхыхьа унагъуэм уасэр зэхуахьэсыху.

Гущэкъуибзэ. Адыхэхэм хабзэу къадек1уэк1ыу щытащ зы жэщым жылэм къыдалъхуа щ1алэ ц1ык1умрэ хъыджэбз ц1ык1умрэ я гущэкъу зэхурабзэу. Ахэр бэлигъ хъуа  иужьк1э унагъуэ хъун хуейуэ арат.

Мыпхуэдэ псалъэхэр куэд дыдэ мэхъур: мастэнищ – обряд первого шитья новобрачной, мастэхьэлыуэ – название блюда, которого готовили во время празднества.

2. Жьы хъуа псалъэхэм я щапхъэу къэтхь хъунущ, пасэ зэманым щы1а классовэ зэхуэмыдэныгъэ гуэр къэзыгъэлъагъуэ псалъэхэр:  уэркъ – уздень; лъхукъуэл1 – сословие свободных крестьян в феодальной Кабарде. Дыжьыныгъуэ- господствующее сословие в Кабарде, следовавшеее за тлякотлешами.

3. 1эщэ л1эужьыгъуэ щы1ахэм я ф1эщыгъэц1э къэзыгъэлъагъуэ псалъэхэр: сагъындакъ – колчан; шабзэ – лук; мыжурэ – штык. Иджык1э къэдмыгъэсэбэпыж хъуауэ, щтаучк1э, гынк1э ягъауэу щыта 1эщэ л1эужьыгъуэхэр: Ержыб, Къалгъэжь, Къарэдае, Къэуал, Кърымщокъал, Къуэдас, Пхэней Хьэжмэстафэ, Щэмп1эуал, Къантэлоуэжь.

4. Адыгэш лъэпкъ щы1ахэм я ф1эщыгъэц1эхэр къэзыгъэлъагъуэ псалъэхэр: Абыкъу, Агъын, Ачэтыр, Бэчкъан, Къундет, Щолэхъу, Щомахуэ, Жэнхъуэт, Къэбан, Мэртазэ Къураты Мысост.

5. Унагъуэм къыщагъэсэбэп хьэпшып куэдым я ф1эщыгъэц1эхэр: тэбакъ – деревянная миска, гуэгуэн —  металлический сосуд для воды,  сыхьэн — миска, блюдо, 1энлъэ – деревянное корыто для теста.

6. Щыгъэн, щэк1, вакъэ къэзыгъэлъагъуэ псалъэхэр: гуэншырыкъ – крестьянская обувь, къэдабэ – бархат, сэнжэху – подшивка к подолу платья, къуху – пуговка, шухьэ – тонкое высококачественное сукно, гуэбэнэч —  верхняя одежда у пастуха из войлока, бырынбыху – род шелковой  ткани.

7. Пасэм щы1эу щыта джэгук1эхэм зэреджэр: мастэпылъэ – состязание в меткости и ловкости, на высоком столбе вешали иголку, которую нужно было сбить на бегу и поймать подолом бурки; шыбгъэрыуэ – игра-состязание всадников, при котором  соревнующиеся стремятся сбить противника на землю; шурылъэс – игра-состязание пеших со всадниками.

8. Жьы хъуа псалъэхэм хэдгъыхьэ хъунущ ахъшэ, щапхъэ гуэр къэзыгъэлъагъуэу щыта псалъэхэр: щай – пятак, пятикопеечная монета,  асмушк1э – восьмушка,

9. 1эщ1агъэ къэзыгъэлъагъуэ псалъэхэр: унащ1э — седельник, дыщэк1 – ювелир, фащ1э — кожных дел мастер, къамышыщ1э – мастер по изготовлению камчей, 1устаз  – учитель.

10. Мэкъумэшым, 1эщ зехьэным, гъавэ зехьэным ехьэл1а псалъэхэр: выуэч – прут, кторым погоняют волов, вэрэвий – упряжка из восьми валов, запряженных попарно в один плуг, вит1мэшхьэсэ  – участок земли, выделяющийся на объединяющиеся семьи, выщхьэф1эщ1э –  груз, прикрепляемый к ярму во время пахоты и боронования,  выщхьэтес —  погонщик волов (во время пахоты.)

11. Жьы хъуа псалъэхэм я щапхъэу къэтхь хъунущ совет зэманым и лъэхъэнэм адыгэбзэхэм къыхыхьа псалъэхэр: райком, генсек; партячейкэ нэгъуэщ1хэри: мыпхуэдэ псалъэхэр нэхъыбэу историзмщ.

Бзэм и дэтхэнэ псалъэхэми хуэдэу жьы хъуа псалъэхэм яхэтщ синоним зэхуэхъу псалъэхэри, омониму зэхущыт псалъэхэри. Синонимхэм я щапхъэщ: шабзэшэ, щ1эндэр – стрела; мэ1у, мэ1уху, джатэпэ1удз – щит; дафэзехьэ, дафэзэф1эхь – шыгъажэ.

Къэбанк1э еджэрт вак1уэр къызэрихьэжам щхьэк1э ящ1 тхьэлъэ1уми, а тхьэлъэ1ум щащ1ым и деж ягъэув нэщанэуап1эми; Дакъэхэк1э хужа1энут 1энэм и1э нэхъыщ1э т1ысып1эми, а т1ысып1эм т1ысын  хуейуэ къызытехуэ нэхъыщ1эхэми Пшэрыхьк1э еджэнущ щак1уэ 1эзэми, а щак1уэм къищ1эк1уами.

Адыгэбзэхэм я жьы хъуа псалъэхэм яхэтщ нэгъуэщ1ыбзэм къыхэк1а псалъэхэри. Къэбэрдеибзэми адыгеибзэми къыхыхьа псалъэ куэд дыдэ къыхэк1ащ урысыбзэм, хьэрыпыбзэм, тюркыбзэ гупым. И бжыгъэк1э нэхъ мащ1эми адыгэбзэхэм къыщок1уэ латиныбзэм, грекыбзэм къыхык1а псалъэхэри.

Урысыбзэм къыхэк1а жьы хъуа псалъэхэщ: арщын (аршин), аргуажьэ (рогожа) (джанэ е бэракъ). Зэрытщ1эщи адыгэбзэм –р-к1э къыщ1идзэ псалъэ и1экъым, абы къыхэк1к1э мы псалъэр адыгэхэм я къэпсэлъык1эм ирагъэуващ; Батырбакъ – порттабак, мы псалъэми фонетическэ зэхъуэк1ыныгъэ щек1уэк1ащ, зэрытщ1эщи къэбэрдеибзэм макъ к и1экъым, аба къыхэк1к1э ар и1э макъымк1э зэрехъэк1 (к→къ; к→к1; к→ч).

Тюркыбзэ гупым къыхэк1а псалъэхэри куэду къыщок1уэ адыгэбзэхэм: Гуэгуэн – высокий металлический кувшин для воды. Къэбэрдеибзэм имызакъуэу кавказыбзэ куэдым къащтащ. Шагъыр А.К. къызэрилъытэмк1э абазинибзэм хэт «гуагуан» псалъэр къэбэрдеибзэм къыхихащ. Гуэбэнэч – войлочный плащ,  мы псалъэри тюркыбзэхэм къыхэк1ащ, абхъаз – адыгэбзэ гупым я зэдайщ. Бейгуэл – лицо, стоящее в свите какой-либо важной особы Шагъыр А.К. зэрыжи1эмк1э, тюркыбзэхэм къыхэк1ащ.

Хьэрыпыбзэм къыхэк1ахэри мащ1экъым. Псалъэм папщ1э тезыр –«наказание» мыхьэнэр и1эщ. Хьэпс – тьюрма, дерс – хьэрыпыбзэм «глава учебника», «лекция», «курс» мыхьэнэр и1эщ, къэбэрдеибзэм къыхыхьа иужьк1э «урок», «домашнее задание» мыхьэнэр игъуэтащ.

Фонетическэ зэщхьэщык1ыныгъэ гуэрхэр я1эми адыгэбзэхэм яхэтщ мыхьэнэк1э зэтехуэ жьы хъуа псалъэ куэд: таж//тандж – шлем; чыл//чэл – шалаш; гуэлмэдын//кулмэдын – шелковый платок; хьэпс//хбапс – темница; джэгуак1уэ//джэгуак1у —  общее название артистов и певцов-импровизаторов; гъуо//гъоу – глашатай; хьэкум//хьыкум – суд; афэ//ашъо – кольчуга; вауэ/цуау – погонщик волов; къуентхъ//къонтхъ – добыча; Лексическэк1э зэщхьэщык1ыу, мыхьэнэк1э зэпэгъунэгъу псалъэхэри хэтщ: арджэн/п1уабл – циновка; зэпэбаш/щэнтал – сошка; пхъэр/шъор – погоня.

Къэбэрдеибзэм жьы щыхъуауэ, адыгеибзэм къыщагъэсэбэп псалъэхэри щы1эщ: зэнтхъ – овес, дыгъэгъазэ/тыгъгъаз – подсолнух.

Адызэбзэхэм къыщык1уэ жьы хъуа псалъэхэр куэд дыдэ мэхъу. Мыбыхэм уелэжьыну, уак1элъыплъыну икъук1э гъэщ1эгъуэнщ ик1и телъыджэщ.

Хь. Т. Тау,

М. Р. Хэжь

Къэгъэсэбэпа литературэ

1. Апажев М.Л. Проблемы кабардинской лексики. Нальчик, 1992.
2. Апажев М.Л. Современный кабардино-черкесский язык: лексикология, лексикография. Нальчик, 2000.
3. Ахманова О. С. Словарь лингвистических терминов. М., 1969.
4. Шагиров А.К. Заимствованная лексика абхазо-адыгских языков. Нальчик, 1989